A Asociación Ourensana de Amigos do Fado presentouse ao público no Hotel Monumento Castelo de Maceda

 

 

O  acto celebrouse, o sábado 23, ás oito da tarde nun dos salóns do Hotel Monumento Castelo de Maceda coa presenza de moito público. A asociación Amigos do Fado presentouse ante eles como unha entidade dinámica que quere potenciar a expresión máis coñecida internacionalmente da música portuguesa. A presidenta, Chus Lago, foi a encargada de presentar aos membros da recén creada directiva e a fadista María do Ceo estivo presente como madriña e motivo de inspiración desta asociación.

A presentación dos Amigos do Fado foi a primeira actividade oficial celebrada no Castelo de Maceda dende que abriu o venres as súas portas baixo a xestión do cociñeiro ourensán Carlos Parra. O fado estará moi presente neste entorno histórico a través das “Xornadas de Fado e Gastronomía” que se celebrarán unha vez ao mes. A primeira no mes de marzo.

Obxectivos e captación de socios

Esta asociación nace para potenciar o fado na provincia. A idea xurdiu no círculo de amizades da fadista María do Ceo para poñer en marcha actividades que impulsen este canto popular portugués, declarado no 2011 pola Unesco como Patrimonio Cultural Inmaterial da Humanidade. Precisamente, María do Ceo, madriña desta entidade, foi a encargada de abrir o acto lembrando que tiña moitas ganas de que alguén se animara a crear unha asociación deste tipo en Ourense xa que hai moita afición. Declarouse moi honrada de ser a madriña e explicou que está moi satisfeita con esta nova iniciativa.

A presidenta, Chus Labrador, foi a encargada de presentar a directiva da nova asociación formada por:

-Presidente de Honor

José Antonio Gurriarán

-Presidenta

Chus Labrador

-Secretario

Anton Alonso

-Tesorero

Carlos Parra

-Vocales

María Jesús Blanco

Armando González

Francisco Javier Casares

A reunión do sábado serviu para comezar a captación de socios que recibirán a través das redes sociais e comunicacións directas información dos actos que se celebren e a partir de agora. Ademais terán prioridade para a asistencia aos mesmos. Calquera interesado en pertencer a ela só terá que apuntarse (de momento) no correo electrónico do castelo:info@hotelcastillodemaceda.com e pagar unha cuota de 20 euros ao ano. A asociación está en proceso de creación do seu propio correo electrónico e presenza en redes sociais.

Xornadas de Fado e Gastronomía unha vez ao mes

Por outra parte, o Hotel Monumento Castelo de Maceda vai contribuir a extender o amor polo fado, organizando unhas xornadas mensuais que tentarán establecer un vencello entre esta música e a boa comida. O seu xerente, Carlos Parra, presentou as xornadas de “Fado e Gastronomía”, unha idea que xa puxo en marcha hai uns anos en outro establecemento no que estaba traballando e que quere recuperar agora no seu novo proxecto. Esta primeira xornada do castelo combinará o fado de María do Ceo cunha cena preparada polo propio cociñeiro Carlos Parra. A sesión de cena e concerto celebrarase nun dos salóns do Castelo no mes de marzo. Nos meses seguintes continuarase con novas actuacións de fadistas e serán cociñeiros de Portugal os que se encargarán de elaborar os pratos da cena. Propiciando así un intercambio entre o Castelo de Maceda e casas de fado de Lisboa, Coimbra e Oporto.

O Hotel Monumento Castelo de Maceda está aberto ao público dende o venres e conta con 5 habitacións para dar aloxamento e o restaurante con pratos de cociña tradicional con toques de innovación a cargo do cociñeiro e xerente, Carlos Parra.

 

 

 

 

 

 

 

-Sinatura da acta de creación da asociación no Castelo de Maceda

 

 

-María do Ceo deleitou ao público asistente cuns fados ao final da reunión.

Unha guía actualizada e novidosa de viños e destilados de Galicia

Unha guía de viños sempre busca promocionar e dar a coñecer unha serie de caldos que xa gozan de presenza en varias publicacións. Iso habitualmente débese a súa calidade e tamén a inversión que fan en publicidade dende as empresas que os producen. Neste caso a guía que chegou as miñas mans “ Guía de Vinos, destilados y bodegas de Galicia” (Servino, Luís Paadín) cumpre o de promocionar viños e destilados de calidade pero ademais une a este obxectivo outros novidosos: que todos os caldos e destilados que figuran na guía son de Galicia e que a publicación non se fixo con publicidade, senón coas aportacións de 180 “mecenas” con nomes e apelidos que antes de que se publicara a guía xa tiñan comprometidos 800 exemplares.

A estas novidades únese que se formaran 18 paneis de cata para 262 catas descriptivas dos viños das denominacións de orixe e indicacións xeográficas protexidas de toda Galicia.O seu autor e editor, Luís Paadín, lembrou na presentación en Valdeorras o pasado día 13 de decembro, que foi un traballo serio e rigoroso no que participaron catadores profesionais galegos e tamén os mecenas tiveron acceso a catas dos viños cos que se estaba traballando. Explicou Paadín que no mundo da cata de viños galegos destaca a presenza de expertos de fora que están a determinar as características dos nosos viños. As características que buscan habitualmente son uns 4-5 gramos de azucre, menos amargos e con madeira. Paadín é un defensor da tipicidade dos viños galegos e para iso buscou catadores de cada zona de produción que coñecían o que cataban e non os ían desvirtuar.

Para darlle máis relevancia a esa cata decidiu adxudicar premios: Prata, Ouro e Gran Ouro, en base a uns tramos de puntuación a partir dos oitenta puntos. Isto tamén é novidade porque non hai puntuacións de 6,35 ou 7,55 senón estas medallas e un comentario breve ao seu lado.

Nesta guía de autor, como a definiu o propio Paadín, recollese o “mellor momento na historia do viño en Galicia”, con “brancos extraordinarios e un potencial enorme en tintos”.

Viños de Valdeorras con Gran Ouro

En total aparecen 475 adegas e destilerías, 1500 referencias e máis de 260 fichas de cata. En canto aos viños da comarca Paadín destacou o gran potencial da comarca e iso demostrase con varios premios para os caldos valdeorreses e tamén para os seus destilados. Os premios máximos, os chamados Gran Ouro, foron concedidos a: Godeval Cepas Vellas, A Coroa 2011, Memoria de Ventura Mencía 2011, Joaquín Rebolledo 2011, Traste 2011, Bioca 2011, As Sortes do Bibei 2011, Vella da chaira do Ramiriño 2010, Via Nova 2011. No apartado de destilados a adega barquense Godeval recibiu unha prata para Mosteiro de Xagoaza licor café, un ouro para o licor de herbas e un gran ouro para a augardente branca. O comentario que figura ao lado da medalla é “esencia de manantial”.

Esta guía recolle tamén unha nota de cata e un premio Ouro ao primeiro viño espumoso amparado pola DO Valdeorras, é o Brinde da adega Roandi ( Éntoma-O Barco). Xunto ao premio figura a seguinte lenda: “poderoso, parece un blanc de noirs”.

Despois de cinco anos sen ter unha guía de viños galegos, daremos a benvida a este traballo que foi sobre todo plural e serio.

Os medios de comunicación con delegación en Valdeorras cubriron o evento. Aquí van os enlaces.

http://www.laregion.es/noticia/235468/enologo/paadin/apuesta/potencial/tintos/

http://www.lavozdegalicia.es/noticia/ourense/2012/12/14/treintena-vinos-ourensanos-logran-gran-oro-guia-galicia/0003_201212O14C10991.htm

Encontro de gastronomia de Excelencia do Eixo Interior

Esta pasada semana, os días 27 e 28, celebrouse na vila ourensana do Barco de Valdeorras o Primeiro encontro de familiarización coa gastronomía de Excelencia. Produtos tradicionais de Galicia e Norte de Portugal. Unha minifeira de exposición e posterior degustación de produtos baixo a marca de Excelencia que organizan dende o Eixo Interior. Unha entidade que pertence ao Eixo Atlántico e dende a que están loitando por promocionar os produtos de Excelencia como o botelo do Barco, os viños de godello como o Godeval Cepas Vellas, o Sousón Barrica de Adegas  Viñaredo, Quinta da Peza Oro da Adega Quinta da Peza a torta de roxóns da Panadería Santigoso, por nomear algúns da comarca. O evento organizouse para que un grupo de 25 personas do mundo da hostalería, turismo e comunicación galegos e portugueses puideran coñecer estes produtos que están amparados baixo a marca Excelencia. Ao día seguinte fixeron unha visita a Adegas Godeval onde degustaron o godello sobre lías (Godeval Cepas Vellas) cun espléndido botelo preparado por Lula, unha cociñeira moi coñecida na comarca pola espléndida man que ten co pulpo e polo que moita xente fai colas nas feiras das vilas. Ademáis Lula e o seu equipo levan moitos anos sendo os encargados de cociñar os botelos que degustamos na Festa do Botelo do Barco no mes de xaneiro.

 

 

O traballo de Solfiro con Bodegas Godeval foi recollido nunha fotografía que saiu en  La Región Valdeorras. Aquí vai o enlace:
http://www.laregion.es/noticia/233831/obarco/riosil/turismo/centrodeproductostradicionales/

 

Estas son fotos do evento do martes pola tarde-noite e da comida do mércores en Godeval.

 

Maridaxes con viños de Valdeorras

O venres, día 9 de novembro, na maridaxe organizada dende o Centro Comercial Aberto do Barco descubrimos novos sabores e sinerxías. Os viños das adegas do Barco: Godeval godello, Hacienda Ucediños godello, Pagos del Galir mencía, Valdouro (mencía e garnacha) da cooperativa e o espumoso de godello Brinde de adegas Roandi, harmonizaron perfectamente cos pinchos que prepararon os cociñeiros Carlos Parra e Roberto Covela. A combinación de porco celta, queixo, grelos, bica e torta de roxóns cos godellos e mencías funcionou seguindo a idea de que nunha harmonía os ingredientes e o xeito de elaborar o prato son importantes á hora de elixir un viño para acompañalo.

Estas foron as harmonías que fixemos entre tapas e viños valdeorreses:

-Os roliños de lombo de porco celta recheos de crema de queixo e crocantes de xamón combinaron co viño Godeval, o godello 100% do 2011.

- Os caprichos de cachucha (de porco celta) rechea de grelos harmonizou con Hacienda Ucediños godello da adega Eladio Santalla Paradelo.

- A crema lixeira de castañas con labras de xamón creou sinerxía co Brinde espumoso de godello da adega Roandi. Foi todo un descubrimento esta combinación de espumoso que incrementaba o sabor das castañas. Un dos máis aplaudidos da sesión.

-Os tacos de lombo de porco celta á galega (un aliño a base de aceite, cebola pochada e pemento doce) atopou boa combinación co Valdouro da adega cooperativa Jesús Nazareno e tamén co Pagos del Galir mencía.

No apartado de sobremesa intentamos combinar os mesmos viños co doce, xa que a maioría das veces, xa non se usan os viños da comida para o momento larpeiro. Pero hai doces que admiten este tipo de combinación polo tipo de ingredientes cos que se elaboran. Ademais o godello coa súa mineralidade potencia o sabor doce.

- A torta de roxóns con salsa de canela combinou cos godellos que potenciaban o sabor da canela.

- A bica con compota de froitos secos creou unha boa sinerxía cos mencías que resaltaban os froitos secos (améndoas, abelás, noces).

Todas estas combinacións non poderían ser posibles sen as mans marabillosas de Carlos Parra do restaurante da Estación de Baños de Molgas e o seu amigo Roberto Covela do restaurante Galileo. Tamén hai que agradecer a idea á xente do Centro Comercial Aberto do Barco, en especial a súa presidenta, Charo López .

 

 

 

Hoxe Solfiro comeza a funcionar cara ao público. A actividade na que estou traballando é unha presentación dunha maridaxe ou harmonía de pinchos cos viños das cinco adegas da vila do Barco. Este acto servirá como clausura da Asamblea do Centro Comercial Aberto da vila. Estades todos invitados para coñecer máis dos viños de Valdeorras e da súa combinación con pinchos feitos a base de carne de porco celta, castañas e outras cousiñas na Casa Río Cigüeño no Barco, hoxe as 21:30 horas.  A velada promete....

SOLFIRO, COMUNICACIÓN E EVENTOS

Solfiro, comunicación e eventos, nace coa ilusión dunha autónoma que se chama Soledad Figueroa, e que quere usar os seus coñecementos coma licenciada en Ciencias da Información e a súa experiencia profesional para asesorar e axudar a pequenas e medianas empresas. O seu campo de actuación comeza no mundo do asesoramento para a creación de campañas de publicidade, mellora de imaxe corporativa, contacto con clientes a través de "mailing", folletos, creación de contidos para webs e blogs e a organización de eventos empresariais.